سمعت قبل كده عن الديتوكس؟ 

طب تعرف إنه واحد من أهم الوسائل اللي هتساعدك في رحلتك مع الدايت؟ ومش بس كده ده هيفيد جسمك جدًا ولما تعرف فوايده الكتير مش هتقدر تستغنى عنه.

تعالى نتعرف عليه اكتر مع بعض ونفهم ده عبارة عن إيه وبيتعمل ازاي.

إيه المقصود بالديتوكس؟

أول حاجة خلينا نفهم معنى الكلمة نفسها وهى اختصار لإيه، ديتوكس هى الاختصار الأسهل لمصطلح Detoxification ومعناه إزالة السموم، وبيكون عن طريق مشروبات بتعملها بتساعدك في العملية دي.

برضه مش فاهم?

الفكرة كلها في مشروبات بتفضل تشربها يوم كامل من غير ما تاكل ولا تشرب أي حاجة تانية معاها، والمشروبات دي هى اللي بتساعدك تتخلص من السموم المتخزنة في جسمك وبتنقيه وبتريحه تمامًا.

طيب إيه المشروبات دي؟

فكرة المشروبات دي بتكون إنك بتاخد مستخلصات أو عصارة بعض الخضروات والفواكه وبتشربهم فجسمك بيحصل على أقصى فايدة مُمكنة منهم.

وفوايد الديتوكس كتير، زي مثلًا:

  - بيريَّح جهازك الهضمي.

  - تخفيف الالتهابات الموجودة في جسمك.

  - توفير النضارة والحيوية لبشرتك.

  - تنقية جسمك من السموم المتراكمة فيه عن طريق إدرار البول.

  - بتزود احساسك بالشبع.

  - رفع مُعدل الحرق وبالتالي هيساعدك تخس اسرع.

طيب ازاي ممكن نعمل مشروبات الديتوكس؟

وصفات الديتوكس كتير ومختلفة حسب رغبة كل شخص، وعشان نسهلها عليك فكل اللي هتحتاجه:

  - خضروات مغسولة كويسة ومتقطعة، زي الخيار واللمون والخس والطماطم والجزر.

  - النعناع والبقدونس والجنزبيل.

  - وممكن تستخدم فاكهة زي البرتقال واليوسفي والأناناس والتفاح والفراولة والتوت والكيوي.

☑️ وطريقة تحضيره سهلة جدًا:

  - هتجيب الفاكهة والخضار المتاحين عندك وتغسلهم وتقطعهم شرائح أو مكعبات أو زي ما تحب.

  - وتحضر ٢ لتر مياه.

  - وتضيف عليهم الخضار والفاكهة.

  - وبعد كده تسيبهم في التلاجة لمدة ساعتين، والأفضل تسيبهم يوم كامل وتستخدم في اليوم التاني.

وبكده هيكون عندكم مشروب ديتوكس تقدر تشربه طول اليوم لتنقية جسمك من السموم ورفع مُعدل حرقك كمان.